У Гародні праўладных назіральнікаў абавязалі запоўніць звароты пра адпаведнасць выбарчага працэсу заканадаўству
У Гародні 13 лютага на ўчастках 102, 103, 104, 105 і 106 у СШ №39 старшыні камісій раздавалі сваім назіральнікам для абавязковага запаўнення і назіральнікам кампаніі “Права выбару” для запаўнення па жаданні бланкі прыгатаваных заяваў пра тое, што на ўчастку выбарчы працэс адпавядае заканадаўству.
Пры тым назіральнікі ў заяве пазначылі дату – 13 лютага.
“То бок яны падпісваюцца пад тым, што назіралі ўвесь працэс цягам дня. Заяўляю і сведчу, што гэта нахабная хлусня! Таму што, да прыкладу, на ўчастку №105 назіральнік №1 была толькі з ранку да 14:00. Назіральнік №2, якая не ведала ад каго яна накіравана і што такое акрэдытацыя ці накіраванне, знаходзілася з 17:30 да 18:00. Назіральнік №3 – давераная асоба праўладнага кандыдата Тараса, нехта Грыгор’еў – заляцеў толькі каб напісаць-падпісаць заяву пра “ўсё добра”. Час знаходжання на ўчастку з 17:30 да 17:35. Назіральнік №4 – давераная асоба праўладнага кандыдата Урублеўскага – таксама прыехаў пад раздачу бланкаў заяў. Час знаходжання на ўчастку з 18:10 да 18:15. Назіральнік №5 быў разам з №4 і рабіў тое самае”, – распавёў актывіст БХД Сяргей Верамеенка, які ўдзельнічае ў назіранні ў межах “Права выбару”.
