Рагачоўская апазіцыя выступае за актыўны байкот выбараў
Рагачоўскія дэмакратычныя сілы абвясцілі аб стварэнні аб’яднанай дэмакратычнай кааліцыі “Грамадзянскі выбар”.
Кааліцыя прыме актыўны ўдзел у выбарчай кампаніі 2012 года. Аднак нягледзячы на чаканне уладаў, што дэмакраты будуць вылучаць кандыдата на парламенцкія выбары, падзеі павярнуліся досыць нечакана.
У пагадненні прынялі ўдзел прадстаўнікі кампаніі “Гавары праўду”, Партыі БХД, Партыі БНФ, “Еўрапейскай Беларусі” а таксама непартыйных актывістаў апазіцыі. Пасля пэўных фармальнасцяў да кааліцыі далучыцца і партыя “Справядлівы свет”.
Каардынатар БХД Дзяніс Дашкевіч распавёў аб выніках пасяджэння:
-Гэта несумненна велізарны крок наперад у палітычным жыцці Рагачова, наш рэгіён стаў адным з першых у Беларусі, хто змог аб’яднацца нягледзячы на некаторыя палітычныя рознагалоссі. Кааліцыя будзе і ў далейшым пашырацца, уступіць можа абсалютна кожны жадаючы, нягледзячы на партыйную прыналежнасць. Безумоўна дэмакратычны рух Рагачова ў апошнія гады не быў яшчэ настолькі згуртаваным, і я абсалютна ўпэўнены, што дадзеная выбарчая кампанія будзе арганізавана на высокім узроўні, тым, больш у кааліцыі складаюцца прадстаўнікі з каласальным вопытам вядзення кампаній, і ўдзелу ў якасці кандыдатаў у тым ліку.
Пракаментаваў актывіст і фармат удзелу ў выбарах:
-Мы вельмі скрупулёзна прааналізавалі сёлетнюю сітуацыю ў краіне і рэгіёне, і прынялі рашэнне, нягледзячы на існуючыя рэсурсы, не вылучаць свайго кандыдата на маючыя адбыцца выбары, калі толькі ўлада не выканае шэраг умоў. Гэтыя выбары, павінны стаць рэферэндумам недаверу ўпершую чаргу мясцовым уладам, хопіць ўжо лічыць людзей за ідыётаў! Палова горада ўжо з’ехала на заробкі ў Расію, а яны нам усё распавядаюць, у якім мы раі жывем!
Мы лічым, што выбараў у краіне проста няма, людзей у чарговы раз хочуць проста зацягнуць на выбарчыя ўчасткі, пасля чаго будзе аб’яўлена чарговая элегантная перамога. Мы не хочам быць часткай чарговага спектакля, над якім ужо простыя людзі проста смяюцца.
Мы маем намер пачаць у самы бліжэйшы час кампанію актыўнага байкоту. Наша задача на маючых адбыцца выбарах, растлумачыць людзям, чаму нельга ісці на гэтыя выбары, растлумачыць народу, што парламента ў краіне проста няма, ён нічога не вырашае. Таксама мы маем намер тлумачыць насельніцтву прычыны эканамічнага крызісу, і да чаго прывядзе далейшае кіраванне краінай цяперашняй улады. вядома ж падаць у даступнай форме шляхі выхаду з крызісу.
Таксама мы маем намер разгарнуць некалькі сацыяльных праектаў, падымаць праблемы мясцовага насельніцтва і патрабаваць ад уладаў іх вырашэння. Гэты год будзе вельмі нялёгкім, але мы разлічваем на падтрымку насельніцтва, бо большасць насельніцтва ўсё ж такі ўжо выдатна разумее, што ўлада проста дурыць ім галаву.
Дадзеная кааліцыя працягне сваю працу і пасля выбарчай кампаніі. У горадзе велізарная колькасць праблем, і мы маем намер пачаць актыўную працу з грамадствам, людзі павінны разумець, што дзверы адчыняюць толькі таму, хто ў іх стукаецца. Мала казаць, што мясцовая ўлада нічога не робіць, неабходна кансалідаваць грамадства і прымусіць мясцовую ўладу нас паважаць і вырашаць нашы праблемы.
