Бабруйскія актывісты распачалі кампанію па ўшанаванні памяці ахвяраў палітычных рэпрэсій (фота)
У Бабруйску 29 кастрычніка мясцовыя актывісты Беларускай Хрысціянскай Дэмакратыі і Аб’яднанай Грамадзянскай Партыі распачалі серыю акцый па ўшанаванні ў горадзе ахвяраў палітычных рэпрэсій.
Замовіўшы ў Мікольскім саборы памінальную службу за сваіх рэпрэсаваных сваякоў і за “ўсіх хрысціянаў, загіблых падчас рэпрэсій бальшавіцкага тэрору”, актывісты з запаленымі ў царкве свечкамі і кветкамі прыйшлі на Плошчу Перамогі, дзе ўсклалі іх да помніку ахвярам палітычных рэпрэсій.
Памінальная служба за ахвяраў палітычных рэпрэсій адбудзецца ў Мікольскім саборы 30 кастрычніка а 8-й гадзіне раніцы. А на кануне, увечары 29 кастрычніка, дэмакратычныя сілы Бабруйска правядуць тэматычную вечарыну іх памяці. Кампанія па ўшаванні ахвяраў працягнецца ў горадзе да 2 лістапада.
“Мы заклікаем усіх тых, чые сваякі таксама сталі ахвярамі рэпрэсій, каму неабыякавы лёс нашай краіны, і ўсіх людзей добрай волі ўшанавць памяць палітрэпрэсаваных і ўскласці кветкі да помніка. Гэтым самым мы выкажам нашу памяць, праявім наша пакаянне, яднанне і салідарнасць”, – адзначыла каардынатар аргкамітэту БХД у Магілёўскай вобласці Таісія Кабанчук.
