Віталю Рымашэўскаму прысудзілі штраф за вандроўку на мітынг у Гомель

07.06.2017, 14:20  |  Галоўныя навіны, Палітыка

Віталю Рымашэўскаму прысудзілі штраф за вандроўку на мітынг у Гомель

 

Сустаршыні Беларускай хрысціянскай дэмакратыі Віталю Рымашэўскаму ДАІ выпісала штраф за вандроўку 1 траўня на мітынг у Гомелі. Нагадаем, што машыну палітыку па дарозе ў Гомель спынялі пяць разоў, у выніку чаго ён вымушаны быў пакінуць аўтамабіль і дабірацца да акцыі пешшу.

 

"На мяне склалі пратакол за тое, што я нібыта рухаўся ў скрайняй левай паласе на хуткаснай трасе пры тым, што ў правай паласе нібыта не было машын. Такую падставу супрацоўнік ДАІ прыдумаў толькі пасля таго, як мы пад відэазапіс настойліва патрабавалі ад яго назваць прычыну нашага спынення”, - адзначыў сустаршыня БХД.

Паводле яго, ДАІ выкарыстоўваецца як інструмент ціску на апазіцыю. Ён нагадаў, што палітыкам не далі даехаць на акцыю пратэсту ў Берасці ў сакавіку. "Нас спынялі пад рознымі надуманымі падставамі: ці то машына нібыта скрадзеныя, ці то мы нібыта падазраемся ў махлярстве. А пасля сканчэння акцыі ў Берасці нас без складання пратаколу адпусцілі. І па дарозе на мітынг у Гомелі ўсё паўтарылася”, - падкрэсліў Віталь Рымашэўскі.

Ён таксама нагадаў, што на падставе сведчанняў аднаго міліцыянта і без відэазапісу была пазбаўленая пасля акцыі ў Маладзечне правоў кіроўцы лідар Сацыяльна-хрысціянскага руху Вольга Кавалькова. "Гэта адна з формаў рэпрэсій. Як раней выкарыстоўвалі падаткавую, так раней выкарыстоўваюць ДАІ”, - заявіў палітык.

"Хоць сума штрафу – адна базавая велічыня – і невялікая, рашэнне аб яго накладанні буду абскарджваць, бо яно палітычна-матываванае”, - заявіў сустаршыня БХД.

Навіны па тэме