Следчы камітэт не захацеў узбуджаць справу за катаванні ў Цэнтральным РАУС 25 сакавіка

05.07.2017, 14:08  |  Галоўныя навіны, Палітыка

 

Цэнтральны (Менска) райаддзел Следчага камітэту Беларусі адмовіўся ўзбуджаць крымінальную справу па факце катаванняў міліцыянтамі Цэнтральнага РАУС затрыманых удзельнікаў акцыі на Дзень Волі 25 сакавіка ў Менску на падставе п. 2 ч. 1 арт. 29 КПК (адсутнасць у дзеяннях складу злачынства). Адпаведны адказ з райаддзелу за подпісам следчага А.Кандратовіча атрымаў адказны сакратар Беларускай хрысціянскай дэмакратыі Дзяніс Садоўскі.

У Следчы камітэт звярнуліся 10 чалавек, якія засведчылі факты недапушчальнага, здзеклівага і маючага прыкметы катаванняў стаўлення да іх і іншых затрыманых 25 сакавіка з боку супрацоўнікаў Цэнтральнага РАУС. Падчас падрыхтоўкі скаргі пры дапамозе праваабарончага цэнтру "Вясна” былі сабраныя сведчанні пра тое, што людзей шэсць гадзін трымалі пад снегам і дажджом на вуліцы, не давалі піць, не пускалі ў прыбіральню, увесь час трымалі на расцяжцы, ужывалі спецсродкі. У сувязі з гэтым у дачыненні да вінаватых прасілі ўзбудзіць крымінальную справу па арт. 426 КК (Перавышэнне ўлады або службовых паўнамоцтваў).

"Упэўніваючых звестак, якія пацвярджаюць выкарыстанне нецэнзурнай лаянкі, абраз, катаванняў, жорсткага, бесчалавечнага абыходжання, а таксама прымяненне фізічнай сілы, спецыяльных сродкаў супрацоўнікамі Цэнтральнага РУУС г.Мінска, у прыватнасці Находкам В.Т. у дачыненні да затрыманых не выяўлена. Па выніках праведзенай праверкі, дастатковых аб'ектыўных дадзеных, якія паказваюць, што супрацоўнікі Цэнтральнага РУУС г.Мінска, наўмысна, насуперак інтарэсам службы, з карыслівай ці іншай асабістай зацікаўленасці злоўжылі сваімі службовымі паўнамоцтвамі, а таксама неналежным чынам выканалі свае службовыя абавязкі з прычыны нядобрасумленнага або нядбайнага стаўлення да службы не знайшлі свайго пацверджання”, - гаворыцца ў адказе са Следчага камітэту.

"Канечне, такія высновы следчых не з’яўляюцца для нас нечаканасцю. Відавочна, што сапраўдная праверка не праводзілася. Райаддзел СК знаходзіцца ў адным будынку з РАУС, што можа сведчыць, што ўсе там адзін аднаго ведаюць і прыкрываюць. Але мы не збіраемся спыняцца. Хутка будзе падрыхтаваная скарга ў райаддзел Следчага камітэту, каб яны ўзнавалі следства. Бо бяздзейнасць да у дачыненні да тых, хто чыніць здзекі з затрыманых, будзе патураць такім дзеянням і надалей. Краіна павінна ведаць прозвішчы тых, хто чыніў здзекі, як, напрыклад, Находка. Таму мы рыхтуем дакументы ў суд, каб праз яго зноў засведчыць усе факты катаванняў у дачыненні да затрыманых 25 сакавіка”, - заявіў Дзяніс Садоўскі.

Навіны па тэме