Актывістаў БХД не задаволіла тое, як зрабілі паркоўку ля кардыяцэнтру (фота)
Хаця на прыёме 7
чэрвеня намеснік старшыні Віцебскага гарвыканкаму Сяргей Саглаеў і заявіў
актывістам Беларускай хрысціянскай дэмакратыі, што паркоўка каля абласнога
кардыялагічнага Цэнтра ўжо
робіцца, аднак тое, што там робіцца, цяжка назваць паркоўкай.
“Даішнікі
паставілі кучу знакаў, адзін папярэджвае, што ўезд на вузкую дарожку ўздоўж
агароджы Цэнтру забаронены. На другім баку – два знакі, што паркоўка тут,
паркавацца трэба ўздоўж праспекту Люднікава да мосту праз Віцьбу, пачынаючы ад
перакрыжавання Люднікава з Гагарына і Камуністычнай, абмінаючы аўтобусны
прыпынак. Папярэчная разметка на гэта ўказвае. Машыны тут і раней паркавалі,
але як бы нелегальна. А вось наведвальнікі не заўважылі зменаў, і па-ранейшаму,
паднырнуўшы пад знак забароны прыпынку, паркуюцца на газоне”, – адзначыла
каардынатар БХД у Віцебску Таццяна Севярынец.
Пры гэтым яна
нагадала, што ўлады абяцаюць зрабіць паркоўку з 2005 года. “І тое, што зрабілі,
не ўскапаўшы газон, утрамбаваны машынамі за шмат гадоў, не паправіўшы бардзюры,
зруйнаваныя тымі ж машынамі, не сведчыць аб гаспадарскім поглядзе на праблему.
А будуць жа справаздачыцца, што па звароце грамадзян зрабілі – якія малойцы! Не,
спадарства, так не пойдзе! 13 чэрвеня ідзем да вас”, – дадала яна.
