Замалёўкі бабулі-5

07.08.2017, 14:57  |  Блогі » Блог Таццяны Севярынец

Замалёўкі бабулі-5З цудоўнай Унорыцы вярнуліся ў Віцебск. І што ж летам малым у горадзе рабіць? Як толькі няма дажджу, выпраўляемся ў роварныя падарожжы. Гэтым разам недалёка – наўпрост ад мікрараёна Білева-2 у вёску Білева, што па левую руку ад пр. Маскоўскі, за невялікае, але аблюбаванае рыбакамі возера – на лугі, дзе расце кіпрэй, у народзе - іван-чай.

На возеры, якое літаральна праз вуліцу ад апошняга дома так званай вёскі, а вуліца называецца Незалежнасці, нехта і праспектам ахрысціў на адраснай шыльдзе, жыве лебядзіная сям’я з пяццю прыгожымі шэрымі пушыстымі падлеткамі, у якіх крылцы падобныя на маленькія рыцарскія шчыткі. Мама-лебедзь не пускае дзяцей наперад. Правярае, ці будуць наведвальнікі частаваць. Блізка не падпускае, шыпіць. Бацька-лебедзь недзе бароздзіць ваду возера, дае нырца па рыбку, бо канкурэнцыя даволі высокая: тут табе рыбакі з усіх бакоў, ды й крачкі не спяць.

Абыходзім возера - ідзем у лугі па лісты кіпрэя. Па дарозе мама Даша распавядае малым, як калісьці іван-чай страціў з-за хітрыкаў ангельскіх купцоў сваю ролю любімага напою і зараз стаў амаль што экзатычным.

Дзіва-дзіўнае: як шмат таго, што расце побач з намі, літаральна пад нагамі па ўсёй Беларусі і з’яўляецца сапраўдным багаццем, скарбніцай вітамінаў і лекаў, мы проста не ведаем…

Цэлая плантацыя самасеянага іван-чая калышацца морам перад намі, дурманіць мядовым водарам канюшыну, чапляе за вопратку дзікая маліна, прапануе малым гасцінцы. Сонечка і Грышаня ведаюць, як трэба абіраць лісце расліны, каб не нашкодзіць ёй, і адначасова ласуюцца малінкай.

Першая партыя цудоўнай народнай гарбаты дома ўжо прайшла перыяды вялення, сушкі, ферметацыі - інтэрнэт навучыў.

А іван-чай ужо адцвітае, і хто не паспеў, той спазніўся. Але праз які час міласці просім на гарбатку! Глядзіш, яшчэ што даведаемся пра нашыя багацці…

Таццяна Севярынец

Замалёўкі бабулі-5
Замалёўкі бабулі-5
Замалёўкі бабулі-5
Замалёўкі бабулі-5
Замалёўкі бабулі-5
Замалёўкі бабулі-5
Замалёўкі бабулі-5
Замалёўкі бабулі-5
Замалёўкі бабулі-5
Замалёўкі бабулі-5
Замалёўкі бабулі-5

Навіны па тэме