Светлагорскі райвыканкам накіраваў хадайніцтва ў Палату Прадстаўнікоў аб неабходнасці змены заканадаўства па ВІЧ

15 кастрычніка 2009 14:52  |  Грамадства

Пра гэта паведаміў БЕЛТА намеснік старшыні Светлагорскага райвыканкама Сяргей Меркулоў. У ліку прапаноў – увесці абавязковы тэст на ВІЧ для людзей, якія ўступаюць у шлюб.


Па словах суразмоўцы, сітуацыя з распаўсюджваннем ВІЧ-інфекцыі ў рэгіёне выклікае сур’ёзную заклапочанасць. За 8 месяцаў зарэгістравана 135 новых выпадкаў, прытым што за ўвесь мінулы год іх было 147. Настарожвае, што палавы шлях распаўсюджвання інфекцыі дасягнуў 86 %. У групу рызыкі зараз увайшлі жыхары 25-40 гадоў, якія раней вельмі рэдка ставіліся на ўлік як інфіцыраваныя.

 

Па меркаванні Сяргея Меркулава, меры прафілактыкі, якія прымаюцца ў рэгіёне, далі свой дадатны эфект, аднак інфармацыйна-асветніцкай працы сёння ўжо не дастаткова. У сувязі з гэтым на апошнім паседжанні выканкама былі выпрацаваныя прапановы па ўнясенні змен у заканадаўства, якія дазволілі бы паўплываць на склаўшуюся сітуацыю.

 

У прыватнасці, раённыя ўлады прапаноўваюць улучыць СНІД у пералік сацыяльна небяспечных захворванняў, што пашырыць магчымасці прафілактыкі. Акрамя гэтага, тут бачаць неабходным увесці абавязковы тэст на ВІЧ для маладых і мужоў цяжарных жанчын, а таксама заканадаўча замацаваць магчымасць абследавання кантактных асоб інфіцыраванага, не паказваючы чыннікі і крыніцы магчымага заражэння. Гэта ў сваю чаргу дазволіць перашкодзіць распаўсюджванню інфекцыі ў тых выпадках, калі сам носьбіт вірусу не ставіць у вядомасць родных і блізкіх аб сваім дыягназе, падвяргаючы іх пагрозе заражэння.

 

У Светлагорскім раёне было зарэгістравана больш за 2,6 тыс. ВІЧ-інфіцыраваных, з іх звыш 700 памерлі. Такім чынам, цяпер, у рэгіёне пражываюць 1,9 тыс. носьбітаў інфекцыі, або чвэрць усіх інфіцыраваных у Беларусі. За няпоўныя тры года ў Светлагорскім раёне даследавана пяць крымінальных спраў інфіцыраваных, якія не паведамілі партнёрам аб сваім дыягназе і падверглі іх пагрозе заражэння.

Болей навін