Павел Севярынец: Мандат Палецкіса – гэта памылка
Дакладчыкам дэлегацыі Еўрапарламента аб Беларусі павінен быць прынцыповы і бескампрамісны чалавек.
Такім чынам палітвязень, сустаршыня БХД Павел Севярынец пракаментаваў сайту charter97.org крытыку дакладуЮстаса Палецкіса Камітэтам замежных справах Еўрапарламента.
«Прызначэнне Палецкіса дакладчыкам было памылкай. Не мне, вядома, раіць еўрапейцам, яны разбяруцца самі і ў наступны раз больш абачліва будуць падбіраць кандыдатуру», – мяркуе палітык.
Ён падкрэсліў, што Юстас Палецкіс з’яўляецца прадстаўніком Літвы, якая звязаная з Беларуссю эканамічнымі інтарэсамі.
«Гэта заўсёды будзе ўразлівай пазіцыяй для кожнага літоўца, і мясцовы бізнэс будзе на яго ціснуць. Літва вельмі моцна залежыць ад беларускага транзіту. Таксама адзначу, што Палецкіс – сацыял-дэмакрат, а левыя ў Еўропе гістарычна сімпатызавалі камунізму і рэжыму тыпу лукашэнкаўскага, бо адчувалі сваяцтва. Камуністычнае «адабраць і падзяліць» больш ці менш зразумела еўрапейскім левым», – дадаў палітычны вязень.
Ён упэўнены, што дакладчыкам дэлегацыі Еўрапарламента аб Беларусі мог бы быць прадстаўнік Еўрапейскай народнай партыі.
«Гэтыя людзі выдатна ведаюць, што такое камунізм, і як змагацца з той маральнай разрухай, якую ён нясе. І дакладчык павінен быць з краіны, якая менш залежная ад сённяшняга рэжыму. Гэта можа быць Польшча ці Швэцыя. Яны досыць ангажаваныя ў беларускія справы і гістарычна не чужыя Беларусі», – падсумаваў Павел Севярынец.
Нагадаем, даклад быў падрыхтаваны для Еўракамісіі, Рады ЕЗ і Службы замежных дзеянняў Еўракамісіі паводле вынікаў візіту Юстаса Палецкіса ў Менск 18-21 сакавіка і выклікаў неадназначную рэакцыю ў Беларусі. Прадстаўнікі апазіцыі і праваабаронцы раскрытыкавалі словы пра паляпшэнне сітуацыі з правамі чалавека ў краіне ў 2012 годзе. Палецкіс, у сваю чаргу, сцвярджае, што такую выснову ён зрабіў на падставе інфармацыі беларускіх праваабаронцаў. Пазней еўрадэпутат прызнаў: фармулёўка пра «паляпшэнне сітуацыі з правамі чалавека» ў справаздачы няўдалая і будзе змененая.
Дэпутат Еўрапарламента ад Польшчы Яцэк Сарыюш-Вольскі паставіў пад сумнеў мандат Палецкіса. Ён сказаў, што аўтар скандальнай справаздачы аб сітуацыі ў Беларусі, ездзіў у Менск з уласнай ініцыятывы або на запрашэнне мясцовых уладаў.
Юстас Палецкіс фігуруе ў плане лорда Бэла ў выратаванні рэпутацыі дыктатуры Лукашэнкі. Справаздача змяшчае пункт «Прамое лабіяванне», дзе гаворыцца аб працы з канкрэтнымі афіцыйнымі асобамі і палітыкамі ЕЗ.
