Сябры БХД ушанавалі памяць Васіля Быкава (фота)
Сябры аргкамітэту па стварэнні партыі “Беларуская Хрысціянская Дэмакратыя” 22 чэрвеня ў 10-ю гадавіну смерці класіка беларускай літаратуры, вернага сына беларускай зямлі Васіля Быкава.
У гэты дзень актывісты БХД наведалі Ўсходнія могілкі ў Менску, дзе пахаваны пісьменнік, і ўсклалі кветкі да ягонай магілы. Пісьменніца Галіна Каржанеўская, якая была асабіста знаёмая з Васілём Быкавым, адзначыла, што “ў кожным народзе ёсць прызнаныя мастацкія таленты. Наш народ імі таксама не абдзелены. Але не кожны талент – з тых многіх, якімі мы ганарымся,– можна назваць “сумленнем нацыі””.
“Толькі Васіля Быкава азначаюць гэтым словам. Сам пісьменнік у апошнія гады жыцця пісаў: “Я не лідэр і не “сумленне нацыі”, я просты стомлены жыццём беларус, які мае толькі адну мэту – застацца сумленным”.
Пазіцыя Васіля Уладзіміравіча ў адносінах да ўлады была бескампраміснай. Зрэшты, непрыняцце было ўзаемнае. Але не асабістая крыўда рухала пісьменнікам, калі ён пакідаў Беларусь. Тут не было чым дыхаць – хіба што суцэльнай хлуснёй і фальшу, чым мусім дыхаць шмат гадоў усе мы.
Дзесяць год прайшло, як з намі няма выдатнага майстра слова, даследчыка чалавечай душы, грамадзяніна. Афіцыйна не прыняты ў сябе дома, ён быў прызнаны светам. І словы “вечная памяць” у дачыненні да выдатнага сына Беларусі выглядаюць зусім не перабольшаннем”, – заявіла яна.
Галіна Каржанеўская таксама прачытала верш “Дзірван”, які заканчваецца словамі: “Дык трэба сеяць. Працаваць. І кропка”. І пажадала, каб праца кожнага з сяброў БХД на грамадскай ніве была плённай.
Пра асобныя факты з жыцця класіка распавёў Максім Гацак. І зноў прагучалі вершы.
