Галіна Каржанеўская патрабуе ўзнавіць яе ў статусе кандыдата ў дэпутаты
Прамоўца Беларускай хрысціянскай дэмакратыі Галіна Каржанеўская, якая балатавалася ў Менгарсавет па Матусевіцкай выбарчай акрузе № 33 (по тай самай, што і старшыня Менгарсавету Васіль Панасюк) і якую Фрунзенская раённая выбарчая камісія зняла з выбараў 13 лютага, падала ў Менскую гарадскую камісію скаргу на зняццё яе з выбараў.
Само рашэнне яна назвала незаконным і неабгрунтаваным.
У скарзе Галіна Каржанеўская адзначае, што першае папярэджанне ёй вынеслі 2 лютага за размяшчэнне плакату без выходных дадзеных. Але выраб друкарскім салонам плакату быў аплочаны за кошт сродкаў выбарчага фонду, а яго ўзор быў яшчэ 31 студзеня перададзены ў Фрунзенскую раённую камісію. Да 1 лютага да плакату ніякіх прэтэнзій з боку камісіі не паступала, «ананімны плакат» для выпраўлення памылкі ёй не вярталі.
Датычна другога папярэджанне, вынесенага за распаўсюд газеты «Народная воля», актывістка заявіла, што асабіста ніякай друкаванай прадукцыі не распаўсюджвала, а спасылка камісіяй на розныя сайты незаконная, бо яны не з’яўляюцца яе персанальнымі. «Таксама ў сваім рашэнні камісія спасылаецца на нейкую ананімную заяву», – адзначыла яна.
У сувязі з гэтым Галіна Каржанеўская просіць Менскі выбаркам прызнаць неабгрунтаваным рашэнне аб зняцці яе з выбараў і ўзнавіць у якасці кандыдата ў дэпутаты.
