Віталь Рымашэўскі. Дзяржаўныя ідэолагі ствараюць сваю сетку «назіральнікаў»

18.09.2015, 14:56  |  Блог Віталя Рымашэўскага, Палітыка

Віталь Рымашэўскі. Дзяржаўныя ідэолагі ствараюць сваю сетку «назіральнікаў»
Як вядома, улады адбудавалі ідэальную для сябе сістэму «падліку» галасоў выбаршчыкаў - выбаркамы працуюць як гадзіны, агучваючы патрэбныя лічбы «прагаласаваўшых» на кожных выбарах. Трапіць у камісію, якая «лічыць» галасы выбаршчыкаў, практычна немагчыма.

Але, нягледзячы на намаганьні ЦВК, беларускія «выбары» ўпарта не прызнаюцца дэмакратычнымі краінамі. У тым ліку па прычыне масавых парушэнняў, зафіксаваных незалежнымі назіральнікамі.

Для міжнароднага прызнання выбараў лагічным было б рэфармаванне заканадаўства і ліквідацыю парушэнняў. Але, як вядома, у беларускай улады свая логіка. І ў гэтым годзе ўлада вырашыла нейтралізаваць працу незалежных назіральнікаў. Для гэтага па ўсёй краіне кіраўнікі ідэалагічных аддзелаў, у дадатак да сістэмы «выбарчых камісій», ствараюць сваю сетку «назіральнікаў». А калі дакладней - сетку правакатараў супраць незалежных назіральнікаў.

Беларускія хрысціянскія дэмакраты з розных рэгіёнаў паведамляюць пра тое, што дзяржаўныя ідэолагі па ўсёй краіне рыхтуюць «назіральнікаў» з ліку работнікаў дзяржаўнай сістэмы адукацыі, ЖЭСаў, дзяржслужачых

Звычайна гэта адбываецца так: па загадзе мясцовага кіраўніка ідэалагічнага аддзела ў выканкам збіраюць супрацоўнікаў адукацыі (настаўнікаў, тэхнічных работнікаў школ), супрацоўнікаў ЖЭСаў, у тым ліку дворнікаў і інш. На сустрэчы праводзіцца падрабязны інструктаж, раздаюцца метадычныя дапаможнікі. «Назіральнікам» паведамляюць, ад якіх арганізацый яны будуць назіраць: "ты - шляхам збору подпісаў (подпісы, вядома, збіраць ніхто не патрабуе), ты - ад партыі Х, ты - ад арганізацыі Y і г.д.» (цяпер зразумела, адкуль бяруцца тысячы сябраў участковых камісіі і назіральнікаў ад фэйкавых зарэгістраваных партый і арганізацый БРСМ, «Белая Русь» і да т.п.).

Ва ўсіх гэтых назіральнікаў маецца адзін каардынатар, перад якім неабходна даваць справаздачу і з якім трэба звязвацца ў выпадку ўзнікнення пытанняў.

Рэальных мэтаў ў гэтай сістэмы назірання дзве:

Па-першае, - гэта супрацьдзеянне незалежным назіральнікам.

Па-другое - пусканне пылу ў вочы міжнародным назіральнікам.

Вось як вызначана «Галоўная задача» для праўладных назіральнікаў у метадычцы, якую раздаюць ідэолагі:

«Правесці маючыя адбыцца прэзідэнцкія выбары на высокім арганізацыйным узроўні, не даць сілам, зацікаўлены ў дэстабілізацыі грамадства, ніякай падставы сарваць выбарчы працэс або не прызнаць вынікі галасавання».

Назіральнікам-правакатарам прапануецца «Узор Акту аб парушэнні Выбарчага кодэкса незалежнымі назіральнікамі», у якім загадзя ўпісана скарга на незалежнага назіральніка за тое, што ён ... «часта падыходзіў да стала выдачы бюлетэняў, вылучаў участковай камісіі прэтэнзіі і прапаноўваў свае рэкамендацыі». Скарга накіроўваецца ў ПРАКУРАТУРУ (!) і выбарчую камісію.

У «даведніку назіральніка» асаблівая ўвага нададзена «працы» з міжнароднымі назіральнікамі. Галоўная мэта - пахваліць супрацоўніцтва з уладамі Беларусі.

Заяву кіраўніку групы міжнародных назіральнікаў:

«Мною было выяўлена, што працэс галасавання на паказаным участку быў арганізаваны і праведзены ў адпаведнасці з патрабаваннямі Выбарчага кодэкса РБ... Прашу далучыць маю заяву і копію справаздачы да матэрыялаў міжнародных назіральнікаў».

І, натуральна, у абавязкі «назіральнікаў» ад улады ўваходзіць дапамогу выбарчым камісіям у барацьбе з незалежнымі назіральнікамі: «Мэтай вашага прысутнасці з'яўляецца садзейнічанне камісіі, .. таму, калі хто-небудзь неабгрунтавана абвінаваціць камісію ў нейкіх парушэннях, вашы тлумачэнні дапамогуць вырашыць непаразуменне».

Выявіць фальш рыхтуемага спектакля «выбары-2015» можа толькі сістэма масавага незалежнага назірання. У гэтым годзе Беларускія хрысціянскія дэмакраты вылучаць больш 400 назіральнікаў па ўсёй краіне. Кампанія «Права выбару» плануе выставіць назіральнікаў на 1000 участках.

Адна з галоўных задач назірання - фіксацыя рэальнай яўкі на выбары. Паколькі падлік галасоў у нашай краіне абсалютна зачынены, яўка - адзінае, што незалежныя назіральнікі могуць зафіксаваць з дакладнасцю да аднаго чалавека. Нагадаю, што юрыдычна выбары адбыліся, калі прагаласавала больш за 50% выбаршчыкаў.

Заклікаю ўсіх неабыякавых людзей стаць назіральнікамі.

Запрашайце сваіх сяброў і знаёмых. Давайце разам зробім крок у барацьбе за права народа выбіраць ўладу і кіраваць сваёй краінай.

"Беларускія навіны"

Навіны па тэме