БХД патрабуе спыніць ціск на Паўла Севярынца

07.04.2017, 12:49  |  Галоўныя навіны, Палітыка

БХД патрабуе спыніць ціск на Паўла Севярынца

Сустаршыня Беларускай хрысціянскай дэмакратыі Павел Севярынец можа правесці за кратамі ў суме каля двух месяцаў.

 

На дадзены момант ён ужо адбыў 15 сутак арышту – з 12 да 27 сакавіка за ўдзел у мітынгу пратэсту супраць дэкрэту пра дармаедаў у Воршы. Затым 31 сакавіка ён быў паўторна асуджаны на 10 сутак арышту за мітынг 3 сакавіка ў абарону Курапатаў – месца масавых расстрэлаў у часы сталінскіх рэпрэсій, якое беларускія ўлады ў чарговы раз спрабуюць забудаваць.

На волю ён мусіць выйсці 10 красавіка, адбыўшы ў суме за кратамі 25 дзён. Але, як стала вядома, у дачыненні да яго ўжо заведзеныя мінімум дзве новыя адміністратыўныя справы: за сустрэчу на волі 30 сакавіка людзей, якія былі затрыманыя 25 сакавіка ў Менску, і за акцыю салідарнасці 31 сакавіка з людзьмі, якіх КДБ ілжыва абвінаваціў у падрыхтоўцы масавых беспарадкаў. За гэта яго могуць асудзіць разам яшчэ на 30 сутак арышту, у выніку па суме Павел Севярынец у сакавіку-красавіку правядзе за кратамі 55 дзён, ці амаль два месяцы.

Беларуская хрысціянская дэмакратыя патрабуе неадкладна вызваліць сустаршыню БХД і пакласці канец яго судоваму пераследу за рэалізацыю сваіх канстытуцыйных і агульначалавечых правоў на свабоду сходаў.Таксама БХД рассылае адпаведныя звароты да сваіх міжнародных партнёраў з просьбай аказаць ціск на ўлады Беларусі ў гэтым пытанні.

Навіны па тэме