Хілары Клінтан уручыць Насце Палажанцы прэмію за мужнасьць

07.03.2011, 18:33  |  Навіны, Свет, Палітыка

8 сакавіка дзяржсакратар ЗША Хілары Клінтан уручыць 10 прэмій жанчынам розных нацыянальнасьцяў і узростаў, якіх аднае адно – выбітная мужнасьць. Упершыню ў гісторыі міжнароднай прэстыжнай прэміі, якая існуе з 2007 году й за час існаваньня якой было ўзнагароджана 38 жанчын, прэмію будуць уручаць беларусцы – 20-гадовай намесьніцы “Маладога Фронту” Насьце Палажанцы. 

 

Уручэньне прэміі адбудзецца ў Міжнародны жаночы дзень у прысутнасьці многіх высокіх чыноўнікаў ЗША і з удзелам адмысловага госьця цырымоніі – першай лэдзі Злучаных Штатаў Мішэль Абамы. 


На жаль, з-за падпіскі пра нявыязд Наста Палажанка асабіста ня зможа прысутнічаць у Вашынгтоне, але прэмія будзе перададзена ў Менск і уручана ёй ва ўрачыстай абстаноўцы. Пра дату й час цырымоніі ў Менску будзе паведамлена пазьней. У Вашынгтоне ж публічна зачытаюць прамову Насты Палажанкі. 


“Я зь вялікім зьдзіўленьнем дазналася пра гэтую прэмію. Калі я ўсьвядоміла сам факт узроўню дадзенай узнагароды, канешне, я была ўсьцешана. Усьцешана, ў першую чаргу, не ўвагаю да сваёй асобы, а ўвагаю да нашай сытуацыі і праблемы. Бо падобная прэмія мне, гэта ўзнагарода для кожнага маладафронтаўца, для кожнага хлопца ці дзяўчыны, якія мараць быць у свабоднай, дабраслаўлёнай Богам Беларусі і ахвяруюць сабою дзеля гэтага”, - гаворыць Наста Палажанка. 


Акрамя Насты Палажанкі, прэміяй за мужнасьць будуць узнагароджаныя Прэзыдэнт Кыргызтана Роза Атунбаева, камерунская журналістка Генрыета Эквэ Эбонга, Марысэла Маралес Ілбанэз – намесьніца Генеральнага пракурора па расьсьледваньнях арганізаванай злачыннасьці (Мэксіка) і іншыя годныя жанчыны сусьвету. 


Дарэчы, Наста Палажанка – не адзіная намінантка прэміі, якая ня здолее прыехаць на ўрачыстую цырымонію – у журналісткі Ёані Санчэз з Кубы гэтаксама не атрымаецца наведаць Вашынгтон. 

Навіны па тэме

Фото юзера Мiхаiл
Мiхаiл 08.03.2011
Баявая ўзнагарода, віншую!!