Тацяна Севярынец атрымала ліст падтрымкі ад прэзыдэнта Эўрапейскай народнай партыі
Тацьцяна Севярынец, маці палітвязьня, лідэра БХД Паўла Севярынца атрымала ліст падтрымкі ад прэзыдэнта Эўрапейскай народнай партыі (European People’s Party, EPP). Вільфрэд Мартэнс, прэзыдэнт EPP, зьвярнуўся да маці зьняволенага ў СІЗА КДБ палітыка са словамі салідарнасьці.
Паводле спадарыні Тацяны, у лісьце з Бэльгіі гаворыцца, што Вільфрэд Мартэнс шакаваны падзеямі 19-га сьнежня ў Менску, што ён лічыць Паўла Севярынца знакавай асобай, і што гатовы прыкладаць намаганьні, каб абстаноўка ў Беларусі нармалізавалася паводле прынцыпаў сапраўднай дэмакратыі.
Тацяна Севярынец кажа, што вельмі ўзрушаная гэтым лістом і дужа ўдзячная за падтрымку і за добрыя словы на адрас сына, які цяпер знаходзіцца ў зьняволеньні.
