Павал Севярынец працуе рознарабочым на складзе (фота)
Сустаршыня аргкамітэту па стварэньні партыі «Беларуская хрысьціянская дэмакратыя» Павал Севярынец, асуджаны да трох гадоў абмежаваньня волі, пачаў працаваць у фэрмэрскай гаспадарцы «Бардо».
Севярынец: «Працую тут падсобным рабочым на складзе. Дапамагаю афармляць дакумэнтацыю, пры неабходнасьці пераношу фарбы ці нешта іншае. Пакуль яшчэ знаёмлюся тут з усім. Начальства добрае, ставіцца няблага».
Фермерская гаспадарка «Бардо» знаходзіцца на тэрыторыі былой вайсковай часткі ў вёсцы Куплін Пружанскага раёну. Размешчана яна адразу каля спэцкамэндатуры, дзе жыве цяпер асуджаны сустаршыня БХД.
Гаспадарка спэцыялізуецца на вырошчваньні бульбы, капусты, буракоў, морквы, збожжавых. Займаюцца тут і вырошчваньнем рыбы.
Павал Севярынец быў працаўладкаваны ў фэрмэрскую гаспадарку «Бардо» па загадзе са спэцкамэндатуры пасьля таго, як шматлікія прадпрыемствы і арганізацыі Пружанаў адмовіліся даць яму працу.
16 траўня Павал Севярынец, які падчас выбараў 2010 году кіраваў выбарчым штабам кандыдата ў прэзыдэнты Віталя Рымашэўскага, быў асуджаны на тры гады абмежаваньня волі з накіраваньнем ва ўстанову адкрытага тыпу паводле ч. 1 арт. 342 Крымінальнага кодэксу (арганізацыя і падрыхтоўка дзеяньняў, якія груба парушаюць грамадзкі парадак, або актыўны ўдзел у іх).
На фота:
1 – Павал Севярынец на працы
2 – Павал Севярынец каля складу, у якім працуе
3 – Анатоль Сахаруша з Малечы прывёз Севярынцу сьвежую прэсу
4 – Галаўны офіс фэрмэрскай гаспадаркі
5 – Вырошчваньне бульбы — адзін з профіляў гаспадаркі
6,7 – Спэцкамэндатура
8 – Імправізаваная трэнажорная заля каля спэцкамэндатуры
9 – Собор Аляксандра Неўскага ў Пружанах, які наведвае Павал Севярынец
