Буйная аварыя цеплавых сетак у Мёрах: мёрзнуць сотні людзей
У горадзе Мёры 20 студзеня здарылася аварыя цеплавых сетак, і дасёння не ліквідаваная. Тэмпература паветра ў шматпавярховіках і некаторых прыватных сядзібах апускалася да 10 градусаў. У многіх дамах размарозіліся і лопнулі батарэі ацяплення.
Карэспандэнт “Вестак” наведаў чатыры прыватныя дамы, якія падключаныя да гарадскіх цеплавых сетак. Батарэі ацяплення ў некаторых дамах ледзяныя, у іншых – трохі цёплыя.
Трэснутая батарэя каля дома Валера Валажонка. Фота Кастуся Шыталя.
У сярэдняй школе №3 вучні і настаўнікі сядзяць на ўроках у цёплай вопратцы.
У трохпавярховым доме, які наведаў карэспандэнт, тэмпература ў кватэрах каля 16-і градусаў. У іншых дамах, кажуць, значна халадней.
Валер Валажонак мацае батарэі: халодныя. Фота Кастуся Шыталя.
Гаспадар аднаго з дамоў, актывіст БХД Валер Валажонак, паказвае трэснутую батарэю. Выкліканыя супрацоўнікі ЖКГ знялі батарэю і адно з памяшканняў засталося без ацяплення. Таксама рамонтнікі зламалі цеплавы лічыльнік.
Тут была батарэя. Дом Валера Валажонка. Фота Кастуся Шыталя.
У другім доме лёд на сценах. У трэцім гаспадар вымушаны выліваць з цеплавой сістэмы ваду, каб адбывалася цыркуляцыя. Помпа не працуе, таму гарачая вада ў батарэі не падаецца.
Жыхароў, якія мёрзнуць, наведаў палітык Павал Севярынец. Вось тут на сценах – лёд. Фота Кастуся Шыталя.
Гаспадар аднаго з дамоў, Іосіф сабраў шаснаццаць подпісаў пад зваротам у райвыканкам з патрабаваннем адрамантаваць ацяпленне. Яму патэлефанаваў інжынер ЖКГ і прыгразіў адключыць дом ад ацяплення зусім.
Сёння міліцыя арыштавала журналістаў Сяржука Кручкова, Насту Рэзнікаву і Аляксандра Пацеева, якія прыехалі з Менску рыхтаваць матэрыял пра аварыю. Журналістаў вывезлі пад канвоем на мяжу горада і, выкарыстоўваючы шантаж, загадалі не вяртацца ў горад.
Але рэпартаж будзе, кажуць яны.
Карэспандэнта “Вестак” улады праваронілі.
Цеплатраса ў горадзе Мёры, з якой цячэ вада. 5 лютага 2014 года. Фота Кастуся Шыталя.
