12 кастрычніка на ўскрайку Шчакатоўскага леса Гомеля, які пачынаецца
адразу за заводам “Крышталь” і які “праславіўся” сваімі
масавымі растрэламі 30-х гадоў, грамадская кампанія “Новы Гомель”, эколагі,
рэспубліканская “Зялёная Сетка” і каардынатар “Народнага
кантролю” па Гомелі, актывіст БХД Андрэй Мельнікаўправялі акцыю
“Сделаем!” – прыбралі гэты кавалак прыроды ад смецця.

За “Крышталём” эколагі прыбіралі і ў 2013 годзе. І трэ адзначыць –
сёлета смецця ўсё ж аказалася меней. Добры прыклад дае пэўны плён: мінакі з удзельнікаў
акцыі не кпілі, а хтось і проста не паляніўся падысці да смеццевага пакунку,
каб выкінуць туды нейкую драбноту (замест каб пад ногі), паведамляе gomelby.com.

У Шчакатоўскім лесе стаіць некалькі мемарыяльных крыжоў ахвярам рэпрэсій, якія
нагадваюць пра тое, што цяперашнія пакаленні памятаюць і прагнуць захоўваць
гістарычную памяць. І прыборка мемарыяльнага лесу апроч экалагічнага непазбежна
набывае і сэнс шанавання памяці пра забітых тут.