У Оршы сабралі 600 подпісаў “За годнае медыцынскае абслугоўванне”
Больш за 600 жыхароў горада Орша паставілі
свае подпісы пад патрабаваннем да Аршанскага райвыканкаму выканаць дзяржаўныя сацыяльныя
стандарты ў галіне аховы здароўя ў адпаведнасці з арт.9 Закона РБ №322-3 ад
11.11.2009г. “Аб дзяржаўных мінімальных стандартах”, паведаміў пра хаду кампаніі «Народны кантроль»
каардынатар аргкамітэта БХД Яўген Анішчанка.
Паводле яго слоў, у горадзе назіраецца
пастаянны адток медыцынскіх кадраў. Узнікла сітуацыя, калі наяўнасць вузкіх
спецыялістаў вылічаецца адзінкамі на ўвесь горад. Да некаторых спецыялістаў запіс даходзіць да двух
месяцаў.
У рамках маштабнай мадэрнізацыі сістэмы аховы
здароўя вобласці ў пачатку 2012 года ў Оршы пачалося будаўніцтва лячэбнага
10-павярховага корпуса гарадской бальніцы №1 імя Сямашкі. Ён павінен стаць самым
буйным медыцынскім аб’ектам у раёне.
Запланавана, што гэта будзе адзіны сучасны
лячэбны цэнтр з мноствам аддзяленняў, якія пераедуць сюды з іншых карпусоў
бальніцы і медыцынскіх устаноў горада: неўралагічным, гемадыялізу,
гінекалагічным, тэрапеўтычным, кардыялагічным, лор-хвароб і афтальмалагічным. Акрамя таго, запланаваны
два дапаможных аддзяленні: дыягностыкі і аднаўленчае (фізіялячэнне, масаж і т.
Д.). На 1-м паверсе размесціцца рэанімацыйнае аддзяленне, пашырыцца
лабараторыя. Пры гэтым улады замоўчваюць той факт, што аддзяленні, якія перавядуць у новы
корпус падвергнуцца скарачэнні ложка-месцаў, некаторыя, па словах лекараў,
скароцяць, удвая.
Увод у строй новага корпуса быў запланаваны на
канец 2013 года. Але тэрміны здачы аб’екта ўжо пераносіліся двойчы. У гэтым
годзе не дабудаваны корпус будзе па ўсёй бачнасці зноў зімаваць без даху. “Няма
грошай”, – кажуць улады горада. Тым не менш, пры адсутнасці сродкаў,
гарадскія ўлады за апошнія чатыры гады на падсвятленне дамоў і святочную
ілюмінацыю выдаткавалі каля 300 тыс. даляраў, а з апошніх “неабходных”
гораду набыткаў – гэта купля да новага года вулічнай елкі коштам 420 млн рублёў.
«А пакуль мы лечымся ў бальніцах, якія былі
пабудаваныя да “гістарычнага матэрыялізму”», – адзначыў Яўген Анішчанка.
