Народныя дэпутаты ад БХД за два гады рэалізавалі больш за 100 сацыяльных праектаў (Фота)
21 студзеня адбылася сустрэча па выніках кампаніі БХД Рада Народных Дэпутатаў. Падчас сустрэчы сябры БХД, якія на працягу мінулага году, праявілі найбольшую актыўнасць былі ўганараваныя сувенірнымі кубкамі з сімволікай БХД.
Агулам за два апошнія гады з моманту старту кампаніі Рада Народных Дэпутатаў рэгіянальнымі актывістамі было рэалізавана больш за 100 сацыяльных праектаў. Гэтак, у некаторых рэгіёнах было арганізаванае вулічнае асвятленне, праведзены рамонт дарог і жыллёвага фонду, рабіліся спробы вяртання гарадскім вуліцам спрадвечных назваў, аховы прыроды і захавання гісторыка-культурнай спадчыны.
– Я лічу, што гэта – перспектыва. Лукашэнка нас душыць, Лукашэнка нас дыскрэдытуе па тэлебачанні. У нас няма іншага шляху як дастукацца да сэрца людзей, як пераканаць іх, што мы альтэрнатыва ўлады, што мы народная партыя, народны рух хрысціянска-дэмакратычны, які змагаецца за інтарэсы простых людзей. Толькі праз Раду Народных Дэпутатаў, толькі праз абарону людзей у іх надзённых патрэбах, у тых самых вострых, балючых пытаннях, з якімі яны сустракаюцца ў сваім прыватным жыцці, – адзначыў сустаршыня БХД Віталь Рымашэўскі.
Рада народных дэпутатаў была створана ў 2010 годзе пасля фальсіфікацыі рэгіянальных выбараў. Дадзеная сустрэча толькі падвяла толькі вынікі кампаніі за апошні год. Праца актывістаў па вырашэнні рэгіянальных праблем працягваецца.
