З Акрэсціна вызвалілі сябра БХД Яўгена Карусейчыка (фота)
16 ліпеня са следчага ізалятара на вуліцы Акрэсціна ў Менску вызвалілі сябра аргкамітэту па стварэнні партыі “Беларуская Хрысціянская Дэмакратыя” Яўгена Карусейчыка, які быў затрыманы ля ўнівермагу “Беларусь” падчас акцыі маўклівага пратэсту ў сераду 6 ліпеня. Сустракаць актывіста прыехалі яго сваякі і сябры БХД, у тым ліку сустаршыня аргкамітэту Віталь Рымашўскі.
“Мяне затрымалі 6 ліпеня ля ўнівермагу “Беларусь” і адвезлі ў РАУС, дзе абвінавацілі ў дробным хуліганстве, нібыта я нецэнзурна лаяўся, размахваў рукамі і невыконваў патрабаванні супрацоўнікаў міліцыі. На заўтра быў суд, які засудзіў мяне да 10 сутак арышту”, – адзначыў актывіст.
“Пасля ўзнікла нейкая блытаніна з дакументамі. Калі ўсіх завезлі ў Жодзіна, мяне і яшчэ некалькі затрыманых змясцілі ў Цэнтр ізаляцыі правапарушальнікаў. Але па дакументах нас таксама адвезлі ў Жодзіна, таму ўсе перадачы ішлі туды, а мы чатыры дні сядзелі без нічога”, – паведаміў Яўген Карусейчык.
