Кнігу 100 пра асобаў хрысціянскай дэмакратыі ў Беларусі прэзентавалі ў Курапатах
Кніга “100 асобаў Беларускай хрысціянскай дэмакратыі” 28 лютага ўпершыню была прэзентаваная на імправізаванай сцэне ў Курапатах. У прэзентацыі прынялі ўдзел аўтары ўкладальнікі: сустаршыня БХД Павел Севярынец, галоўны рэдактар Krynica.info Максім Гацак, кіраўнік Супольнасці хрысціянскіх журналістаў і блогераў Вікторыя Чаплева.
Кніга складаецца са ста артыкулаў пра тых дзеячоў, якія стаялі ля вытокаў хрысціянскай дэмакратыі ў Беларусі на пачатку 20 стагоддзя, развівалі яе ў міжваенны перыяд і адраджалі ў незалежнай Беларусі. Гэтая кніга — біяграфіі святароў, мецэнатаў, пісьменнікаў і грамадскіх дзеячоў, многія з якіх былі закатаваныя ў ГУЛАГу або расстраляныя. Гэтая кніга — пра тых людзей, якія першыя сталі будаваць Беларусь па прынцыпе “Беларуская форма — хрысціянскі змест”.
Галоўны ўкладальнік, аўтар большасці артыкулаў Павел Севярынец выказаў думку пра тое, што магчыма, нехта з герояў артыкулаў быў расстраляны ў Курапатах.
У кнізе таксама маюцца артыкулы і пра сучасных дзеячоў хрысціянскай дэмакратыі — Зянона Пазняка, Паўла Севярынца, Змітра Дашкевіча…
Пасля прэзентацыі кнігі адбылося штомесячнае ўшанаванне памяці ў Курапатах. І на заканчэнне — ужо традыцыйна малітва Гасподняя.
Хрысціна Вільчэўская, Krynica.info
